НҰР-СҰЛТАН. ҚазАқпарат – Қазақстандық Анна Данилина жұптық сында Доха WTA 1000 турнирін жеңіспен бастады, деп хабарлайды ҚазАқпарат тілшісі.
Жалпы жүлде қоры 2,6 млн АҚШ долларынан асатын жарыстың 8-ракеткалары болып тіркелген А.Данилина бразилиялық Беатрис Хаддад Майямен бірге алғашқы айналымда ұлыбританиялық Саманта Маррей – нидерландылық Бибиана Схоофспен кездесті.
Қазақстандық-бразилиялық жұп 6:0, 6:4 есебімен жеңіске жетті.
Бір сағатқа жуық уақытқа созылған бәсеке барысында Беатрис пен Анна 2 эйс жасап, 6 брейк-пойнтты түгел пайдаланды. Қарсыластары 2 эйс, 2 брейктен (6 брейк-пойнт) аса алған жоқ.
Қазақстандық-бразилиялық жұптың екінші айналымдағы қарсыластары кейін анықталады.
Қазақстанның бірінші, әлемнің 20-ракеткасы Елена Рыбакина жекелей сында дүниежүзілік рейтингте 71-орында тұрған румыниялық Жаклин Адина Кристианнан 4:6, 3:6 есебімен жеңіліп қалды.
Еске сала кетейік, бұдан бұрын Юлия Путинцеваның Дохада әлемнің бұрынғы бірінші ракеткасына жол бергенін, Александр Бубликтің әлемдегі үздік 30 теннисшінің қатарына кіргенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).