АСТАНА. ҚазАқпарат - Мельбурн қаласында теннистен өтіп жатқан Австралия ашық чемпионатының екінші айналымында қазақстандық Александр Бублик тунис ойыншысы Малик Жазиримен кортқа шықты, деп хабарлайды «ҚазАқпарат» ХАА тілшісі.
www.championat.com сайтынан алынған мәліметке қарағанда, 19 жасар А.Бублик өзінің тәжірибелі қарсыласы, 33 жастағы М.Жазириден айласын асыра алмады. Сөйтіп 2:6, 3:6, 5:7 есебімен жеңіліс тапты. Дегенмен қазақстандық жас теннисшінің іріктеу сайыстарынан өтіп, Австралия ашық чемпионатының екінші айналымына дейін жетуінің өзі жақсы табыс деуге болады. Қазір ол әлемдік сатыда 207-інші орында тұрса, бұл біріншіліктен кейін рейтингісі көтерілері анық.
Еске сала кетейік, сонымен Австралия турнирінде жекелей сында Қазақстаннан Юлия Путинцева ғана қалды. Ол 19 қаңтар күні таңертең латвиялық Елена Остапенкомен күш сынасады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).