Теннис: Әйелдер арасында «Ролан Гаррос» турнирінің жеңімпазы анықталды
Финалда әлемнің 1-інші ракеткасы, румыниялық Симона Халеп пен дүниежүзілік рейтингте 10-ыншы орында тұрған америкалық Слоан Стивенс кездесті.
Финалға сай аса тартысты өткен бәсекеде алдымен америкалық теннисші басымдылық көрсетті. Бірінші партияны 6:3 есебімен ұтқан ол екінші сетте де 2:0 есебімен алда тұрды. Алайда бұдан кейін румыниялық теннисші өзінің нағыз 1-інші ракеткаға сай ойыншы екенін таныта білді. Сөйтіп ол қалған екі партияда 6:4, 6:1 есебімен жеңіске жетті.
Осылайша С.Халеп өзінің спорттық жолында алғаш рет «Үлкен дулыға» турнирінің жеңімпазы атанды. Бұған дейін 2014 және 2017 жылдары «Ролан Гаррос» және 2018 жылы Австралия ашық чемпионатының финалына шыққан оның жолы болмап еді. Бұл жолы ол чемпион атанғаны үшін 2 млн доллар табыс табады.
Ерлер арасындағы «Ролан Гаррос» турнирі ертең мәреге жетеді. Соңғы бәсекеде әлемнің 1-інші ракеткасы, испаниялық Рафаэль Надаль мен рейтингте 7-сатыда тұрған австриялық Доминик Тим ойнайды. Р.Надаль осымен «Ролан Гаррос» турнирінің финалына 11-інші рет шығып отыр.
Еске сала кетейік, қазақстандықтардан бұл турнирде сәтті өнер көрсеткен Юлия Путинцеваның ширек финалға дейін жеткенін жазған болатынбыз.