НҰР-СҰЛТАН. ҚазАқпарат – Қазақстанның бірінші, әлемнің 38-ракеткасы Александр Бублик Цинциннати ATP мастерс турнирінің екінші айналымына шықты, деп хабарлайды ҚазАқпарат тілшісі.
Қазақстандық теннисші бастапқы кездесуін әлемнің 66-ракеткасы, америкалық Маркос Хиронмен өткізді.
Бірінші партияда корт иесі 6:3 есебімен басымдылық көрсетті. Екінші сетте А.Бублик дәл сондай есеппен есе қайырды.
Үшінші, шешуші партияда ойын тағдыры тай-брейкте шешілді. Мұнда қазақстандық спортшы бірінші матчболын мүлт жіберген жоқ – 7:6 (7:5).
Тартысты өтіп, 2 сағат 6 минутқа созылған матч барысында Бублик 21 эйс жасап, 5 брейк-пойнттың екеуін пайдаланды.
Америкалық теннисші 12 эйске қол жеткізіп, 10 брейк- пойнттың екеуін өз есебіне жазды.
А.Бублик екінші айналымда әлемнің 21-ракеткасы, болгариялық Григор Димитровпен күш сынасады. Ол алғашқы айналымда әлемнің 16-ракеткасы, испаниялық Роберто Баутиста-Агутты 6:3, 6:4 есебімен тізе бүктірді.
Жүлде қоры 3 млн АҚШ долларынан асатын Цинциннати жарысы 22 тамызда аяқталады.
Еске сала кетейік, бұдан бұрын Юлия Путинцеваның Цинциннати турнирін жеңіспен бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).