НҰР-СҰЛТАН. ҚазАқпарат – Қазақстанның бірінші, әлемнің 43-ракеткасы Александр Бублик Дубай ATP 500 турнирінің үшінші айналымына шыға алмады, деп хабарлайды ҚазАқпарат тілшісі.
Қазақстандық теннисші екінші айналымда әлемнің 32-інші, осы доданың 16-ракеткасы, италиялық Янник Синнермен күш сынасты.
Бірінші партияда А.Бублик айқын басымдылық көрсетті – 6:2.
Екінші сет тай-брейкке дейін жетіп, онда италиялық теннисшінің асығы алшысынан түсті – 7:6 (7:2).
Үшінші, шешуші партияда есеп 4:4 болған кезде Бубликтің бірнеше рет қателескенін пайдаланған Синнер брейк жасап кетті. Содан кейін матчқа доп бергенде, өз мүмкіндігін мүлт жіберген жоқ – 6:4.
Тартысты бәсеке 2 сағат 5 минутқа созылды.
Я.Синнер ширек финалға шығу үшін әлемнің 11-інші, осы жарыстың 4-ракеткасы, испаниялық Роберто Баутиста-Агут немесе рейтингте 221-сатыдағы аустралиялық Мэттью Эбденнің біреуімен таласады.
Еске сала кетейік, бұдан бұрын А.Бубликтің ATP чемпиондық кестесінде 9-орынға көтерілгенін, М.Кукушкиннің Дубай турнирінің екінші айналымына шыға алмағанын жазған болатынбыз.
Сондай-ақ Алматыда жасөспірімдер арасында Қазақстан біріншілігі өтеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).