НҰР-СҰЛТАН. ҚазАқпарат – Қазақстанның бірінші, әлемнің 47-ракеткасы Александр Бублик Дубай ATP турнирінің ширек финалына шыға алмады, деп хабарлайды ҚазАқпарат тілшісі.
А.Бублик екінші айналымда әлемнің алтыншы, осы доданың 2-ракеткасы, грекиялық Стефанос Циципаспен күш сынасты.
Тартысты өрбіген бірінші партияда грекиялық теннисші тай-брейкте басым түсті – 7:6 (7:1).
Екінші партияда да ол мүмкіндігін мүлт жібермеді – 6:4.
Бәсеке 1 сағат 36 минутқа созылды.
С.Циципас жүлде қоры 2,8 млн АҚШ долларына бағаланған жарыстың жартылай финалына шығу үшін әлемнің 29-ракеткасы, грузиялық Николоз Басилашвили немесе рейтингте 34-сатыдағы германиялық Ян-Леннард Штруфтың біреуімен таласады.
Еске сала кетейік, бұдан бұрын Ю.Путинцеваның Доха турнирінің үшінші айналымына шыққанын, Е.Рыбакинаның әлемнің 1-ракеткасымен кездесетінін, алайда жарақатына байланысты одан бас тартқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).