АСТАНА. ҚазАқпарат - Қазақстандық Александр Бублик Акапулько (Мексика) қаласында өтіп жатқан Мексика ашық чемпионатында аустралиялық Танаси Коккинакиспен күш сынасты, деп хабарлайды «ҚазАқпарат» тілшісі.
А.Бублик дүниежүзілік рейтингте 142-інші, ал аустралиялық теннисші 199-ыншы орында тұрған болатын. Соған қарамастан, Т.Коккинакис шеберлік танытып, 1 сағат 10 минутқа созылған матчта 6:4, 6:3 есебімен жеңіске жетті.
Осылайша жүлде қоры 1,6 млн АҚШ қорынан асатын Акапулько турнирінде А.Бублик алғашқы айналымнан аса алмады. Ол негізгі турнирге іріктеу сайыстарынан кейін қосылған болатын.
Еске сала кетейік, Қазақстанның бірінші, әлемнің 88-інші ракеткасы Михаил Кукушкин де Дубай турниріндегі бірінші кездесуінде грекиялық Стефанос Циципастан жеңіліп қалған болатын.
Фото: www.eurosport.ru
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).