НҰР-СҰЛТАН. ҚазАқпарат – Қазақстанның бірінші, әлемнің 45-ракеткасы Александр Бублик Мельбурнда өтіп жатқан ATP 250 Great Ocean Road Open турнирінің ширек финалына шыға алмады, деп хабарлайды ҚазАқпарат тілшісі.
Қазақстандық теннисші үшінші айналымда рейтингте 71-орында тұрған италиялық Стефано Травальямен күш сынасты.
Бірінші партияда италиялық теннисшінің айқын басымдылығы байқалды – 6:1.
Екінші сетте есесіне А.Бублик брейкпен алға кетті. Әйтсе де есеп 5:4 болып, сетке доп бергенде, сол мүмкіндігін пайдалана алмады. Жеңіс С.Травальяның еншісінде кетті – 7:5.
Бәсеке 1 сағат 6 минутқа созылды.
С.Травалья ширек финалда әлемнің 29-ракеткасы, Польша өкілі Хуберт Гуркач немесе рейтингте 70-сатыдағы уругвайлық Пабло Куэвастың біреуімен шеберлік байқасады.
Енді А.Бублик 8 ақпанда басталатын Аустралия ашық чемпионатында бақ сынайды.
Еске сала кетейік, бұдан бұрын Аустралия ашық чемпионатының кейінге қалдырылмайтынын, Александр Недовесовтің Анталия турнирінің жартылай финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).