НҰР-СҰЛТАН. ҚазАқпарат – Қазақстанның бірінші, әлемнің 42-ракеткасы Александр Бублик Монте-Карло (Монако) мастерс турнирінің екінші айналымына шыға алмады, деп хабарлайды ҚазАқпарат тілшісі.
А.Бублик жүлде қоры 2 млн еуродан асатын ірі доданың алғашқы айналымында әлемнің 53-ракеткасы, 34 жастағы франциялық Жереми Шардимен кездесті.
12 сәуір күні бірінші партияда есеп 5:4 болып, Ж.Шарди жеңіп жатқан мезетте жаңбырға байланысты матч кейінге қалдырылды.
Бүгін жалғасқан ойында әуелі франциялық теннисші басымдылық көрсетті – 6:4.
Екінші сетте қазақстандық спортшы қарсыласына бірде-бір гейм берген жоқ – 6:0.
Шешуші, үшінші партияда тәжірибелі француз жеңісті жұлып алды – 7:5.
Бәсеке 1 сағат 41 минутқа созылды.
Бұдан бұрын А.Бублик Майамидегі мастерс турнирінде барынша табысты өнер көрсетіп, ширек финалға дейін жеткен болатын. Бұл жолы алғашқы айналымнан аса алмай қалды.
Еске сала кетейік, бұдан бұрын Дэвис кубогының топтық кезеңінде Қазақстанның Мадридте ойнайтынын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).