АСТАНА. ҚазАқпарат - 6-12 сәуірде АҚШ-тың Чарльстон (Оңтүстік Каролина) қаласында теннистен өтетін халықаралық турнирде Қазақстанның үш бірдей спортшысы бақ сынайды.
Чемпионат.ком сайтынан алынған мәліметке қарағанда, аталмыш жарыстың жүлде қоры - 731 мың АҚШ доллары. Қазақстанның үздік теннисшісі Зарина Дияс Чарльстон турниріне 11-інші ракетка ретінде қатысқалы отыр. Оның алғашқы қарсыласы әзірге белгісіз. Тағы бір қазақстандық Ярослава Шведова бірінші айналымда швейцариялық Стефани Фегельмен кортқа шықса, Юлия Путинцева бұрынғы отандасы, ресейлік Евгения Родинамен күш сынасады.
Айта кетейік, аталмыш турнирдің бірінші және екінші ракеткалары - канадалық Эжени Бушар мен ресейлік Екатерина Макарова. Жарыстың өткен жылғы жеңімпазы, германиялық Андреа Петкович үшінші болып тіркелген. Басқа да мықтылар бар. Әйелдер арасындағы бұл бәсеке 1973 жылдан бері ұйымдастырылып келеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).