АСТАНА. ҚазАқпарат - Қазақстандық Зарина Дияс Тайбэйде өтіп жатқан халықаралық турнирдің бірінші айналымында ресейлік Анна Блинковамен кездесті, деп хабарлайды «ҚазАқпарат» тілшісі.
Бірінші партияда Зарина 6:2 есебімен онша қиналмай, жеңіске жетті. Барлығы 1 сағат 29 минутқа созылған бәсекенің екінші партиясы тартысты болды. Есеп 3:5 болып тұрған мезетте қазақстандық теннисші өз геймін алумен бірге брейк жасай білді. Сосын есепті теңестіріп қана қоймай, тағы бір брейкке қол жеткізіп, 7:5 есебімен матчты аяқтады.
Жарыстың алтыншы ракеткасы болып тіркелген Зарина екінші айналымда румыниялық Моника Никулеску немесе Тунис елінің өкілі Онс Жабердің қай жеңгенімен кортқа шығады.
Осылайша, Тайбэй турнирі (жүлде қоры - 226750 АҚШ доллары) қазақстандық теннисшілер үшін сәтті басталды. Мұның алдында Юлия Путинцева жапониялық Дзюнри Намигатаны 6:2, 6:4 есебімен тізе бүктірген болатын.
Алғашқы айналымда күтпеген нәтиже де тіркелді. Осы турнирдің екінші ракеткасы, қытайлық Чжан Шуай украиналық Катерина Козловадан жеңіліп қалды.
Аталмыш жарыс 4 ақпан күні мәреге жетеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).