НҰР-СҰЛТАН. ҚазАқпарат – Қазақстанның бірінші, әлемнің 21-ракеткасы Елена Рыбакина Берлин WTA 500 турнирінің ширек финалына шыға алмады, деп хабарлайды ҚазАқпарат тілшісі.
Дәл бүгін 22-ге толған қазақстандық теннисші екінші айналымда әлемнің 13-інші, осы жарыстың 6-ракеткасы, «Үлкен дулыға» турнирінің екі мәрте чемпионы, испаниялық Гарбинье Мугурусамен кездесті.
Бірінші партияда есеп 2:2 болған мезетте испаниялық спортшы брейк жасап кетті. Қазақстандық теннисші таразы басын теңестіргенімен, сол қарқынын жалғастыра алмады.
Тағы бір брейк жасаған Г.Мугуруса сетті өз пайдасына аяқтады – 6:4.
Испаниялық теннисші екінші сетте де брейкпен алға шықты – 3:2. Содан кейін матчты тағы бір брейкпен түйіндеді – 6:3.
Бір сағат 43 минутқа созылған бәсеке барысында Г.Мугуруса 4 брейк-пойнттың үшеуін пайдаланды. Керісінше Е.Рыбакина 7 брейк-пойнттың біреуін ғана өз есебіне жаза алды.
Елена 10 эйс жасаса, қарсыласы мұнымен мақтана алған жоқ.
Г.Мугуруса жартылай финалға шығу үшін франциялық Ализе Корнемен таласады.
Еске сала кетейік, бұдан бұрын Зара Дәркеннің Украинадағы турнирдің жартылай финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).