НҰР-СҰЛТАН. ҚазАқпарат – Қазақстанның бірінші, әлемнің 20-ракеткасы Елена Рыбакина Индиан-Уэллс WTA 1000 турнирінің төртінші айналымына шықты, деп хабарлайды ҚазАқпарат тілшісі.
Қазақстандық теннисші үшінші айналымда кезінде дүниежүзілік рейтингте көш бастаған, қазір әлемнің 15-ракеткасы, Аустралия ашық чемпионатының екі дүркін чемпионы, осы жарыстың өткен жылғы финалисі, Беларусь өкілі Виктория Азаренкомен шеберлік байқасты.
Қарсыластар бұған дейін кездеспеген еді.
Е.Рыбакина сағат жарымнан астам уақытқа созылған матчта 6:3, 6:4 есебімен жеңіске жетті. Екінші сетте В.Азаренко медициналық көмекке де жүгінді.
Қазақстандық теннисші 5 эйс жасап, 8 брейк-пойнттың екеуін пайдаланды. Беларусь спортшысы 3 эйспен шектелді.
Е.Рыбакина жүлде қоры 8,4 млн АҚШ долларына бағаланған доданың ширек финалына шығу үшін әлемнің 51-ракеткасы, швейцариялық Виктория Голубичпен таласады. Ол осы жарыстың екінші айналымында тағы бір қазақстандық Юлия Путинцеваны ұтып кеткен еді.
Еске сала кетейік, бұдан бұрын Александр Бубликтің Индиан-Уэллсте Олимпиада чемпионын ұтқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).