НҰР-СҰЛТАН. ҚазАқпарат - Қазақстанның бірінші, әлемнің 12-ракеткасы Елена Рыбакина Санкт-Петербург WTA 500 турнирін жеңіспен бастады, деп хабарлайды ҚазАқпарат тілшісі.
Жарыстың 3-ракеткасы болып тіркелген қазақстандық теннисші алғашқы айналымда дүниежүзілік рейтингте 81-орында тұрған ресейлік Варвара Грачевамен кездесті.
Бірінші партияда екі брейк жасаған қазақстандық теннисші айқын басымдылық көрсетті - 6:2.
Екінші сетте алғашқы геймін В.Грачева алғанымен, одан кейін Е.Рыбакина дес бермеді - 6:1.
Бір сағатқа жуық уақытқа созылған матчта Е.Рыбакина 5 эйс жасап, 9 брейк-пойнттың бесеуін пайдалана білді.
Қазақстандық теннисші ширек финалға шығу үшін әлемнің 42-ракеткасы, чехиялық Тереза Мартинцовамен таласады.
Еске сала кетейік, бұдан бұрын Александр Бубликтің жұптық сында Роттердам турнирінің ширек финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).