01:01, 22 Қараша 2021

Теннис: Қарағандыдағы халықаралық турнирде қазақстандықтар жеңіске жетті

ҚАРАҒАНДЫ. ҚазАқпарат – Қарағандыда 18 жасқа дейінгілер арасында ITF Junior J5 халықаралық турнирі мәреге жетті, деп хабарлайды ҚазАқпарат тілшісі.

Қазақстан теннис федерациясы мәлім еткендей, қыздар арасында жекелей және жұптық сында қазақстандық спортшылар жеңіске жетті.

Финалда 14 жасар Іңкәр Дүйсебай ресейлік Мария Сысоеваны ұтты.

Бірінші партияда М.Сысоева басымдылық танытты – 6:4.

Есесіне екінші сетте Іңкәр қарсыласына бірде-бір гейм берген жоқ.

Шешуші, үшінші партияда есеп 4:4 болған мезетте І.Дүйсебай брейк жасап, сосын матчқа доп бергенде, өз мүмкіндігін жіберген жоқ – 6:4.

Осылайша Алматы қаласы теннис мектебінің түлегі биыл 18 жасқа дейінгілер арасында ITF сериясы бойынша екінші титулына қол жеткізді.

Жұптық сында Асылжан Арыстанбекова мен Әдемі Аманкелді соңғы бәсекеде ресейліктер Полина Скопинцева – Мария Сысоеваны 6:4, 6:4 есебімен тізе бүктірді.

Бұл Асылжанның жұптық сындағы биылғы осындай үшінші табысы болса, Әдемі үшін бірінші чемпиондық атақ еді.

Бозбалалар арасында Ерасыл Ерділда финалда ресейлік Дмитрий Бурцевке 2:6, 3:6 есебімен есе жіберді.

Жұптық сында финалдық бәсекеде қазақстандықтар бас жүлдені сарапқа салды. Онда Ілияс Маратұлы мен Илья Ведмедь Е.Ерділда мен Александр Черномазды 3:6, 6:3, 11:9 есебімен ұтты.

Еске сала кетейік, бұдан бұрын Тимофей Скатовтың Бразилиядағы турнирдің жартылай финалына шыға алмағанын жазған болатынбыз.


Спорт Қарағанды облысы
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).