20:33, 08 Сәуір 2018

Теннис: Қазақстан Дэвис кубогының жартылай финалына өте алмады

АСТАНА. ҚазАқпарат - Бүгін Вараждин қаласында Дэвис кубогы үшін әлемдік топтың ширек финалында Қазақстан мен Хорватия матчының кездесуі жалғасты, деп хабарлайды ҚазАқпарат тілшісі.

Осыған дейін хорваттар 2:1 есебімен алда тұрған еді. Ал қазақстандықтарға жеңіс ауадай қажет болатын. Сондықтан бар үмітті Қазақстанның бірінші, әлемнің 92-інші ракеткасы Михаил Кукушкинге артуға тура келді. Ол әлемнің үшінші ракеткасы Марин Чиличпен күш сынасты. Мықтының аты мықты, М.Чилич 2 сағат 2 минутқа созылған матчта 6:1, 6:1, 6:1 есебімен жеңіске жетті.

Сөйтіп матчтық кездесуде хорваттар 3:1 есебімен алға шығып, әлемдік топтың жартылай финалына жолдама алды. Енді Борна Чорич пен қазақстандық Дмитрий Попконың ойыны ештеңені шешпейді.

Еске сала кетейік, жұма күні М.Чилич Д.Попконы жеңсе, М.Кукушкин Б.Чоричті қапы қалдырып, таразы басын теңестірген еді. Кеше жұптық бәсекеде хорваттар Иван Додиг пен Никола Мектич қазақстандықтар Александр Недовесов пен Тимур Хабибуллинді тізе бүктіріп, командасын 2:1 есебімен алға шығарған болатын.

Дэвис кубогының жартылай финалында Хорватия құрамасы 14-16 қыркүйекте АҚШ командасымен сынға түседі.

Спорт Қоғам
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).