АСТАНА. ҚазАқпарат - Астанадағы Ұлттық теннис орталығында 1/8 финалында Қазақстан мен Италия арасындағы матчтың соңғы, шешуші бәсекесінде Александр Недовесов Фабио Фоньинимен кездесті.
Осыған дейін есеп 2:2 болып тұрған еді. А.Недовесов әлемдік рейтингте 130-ыншы орында тұрса, Италияның бірінші ракеткасы Ф.Фоньинидің 22-інші сатыда келе жатқаны белгілі. Соған қарамастан, кездесу аса тартысты өтті. Бірінші партияда А.Недовесов 7:6 есебімен тай-брейкте жеңіске жетсе, одан кейінгі екі сетте (3:6, 4:6) итальяндық теннисшіге есе жіберді. Төртінші партияда қазақстандық теннисші 6:3 есебімен басым түсті. Бесінші, шешуші партияда Александр бірден ойын тізгінін қолына алып, есепті 4:1-ге жеткізді. Алайда содан кейін екі брейк пен қос геймді сәтті пайдаланған Ф.Фоньини 5:4 есебімен алға шықты. Бірақ бұдан кейін А.Недовесов қайратына мініп, 7:5 есебімен жеңіске жетті. Ойын 3 сағат 45 минутқа созылды.
Сөйтіп Қазақстан құрамасы Италияны 3:2 есебімен жеңіп, ширек финалға жолдама алды. Онда қазақстандықтар Австралия құрамасымен шеберлік байқасады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).