НҰР-СҰЛТАН. ҚазАқпарат – Қазақстандықтар Гөзал Айнитдинова мен Жібек Құламбаева жұптық сында Анталиядағы ITF турнирінің жартылай финалына шықты, деп хабарлайды ҚазАқпарат тілшісі.
Қазақстан теннис федерациясы мәлім еткеніндей, жүлде қоры 15 мың АҚШ долларына бағаланған додада қазақстандық жұп әуелі ресейлік Дарья Астахова мен боливиялық Ноэлия Себальосты 6:4, 6:4 есебімен тізе бүктірді.
Г.Айнитдинова мен Ж.Құламбаева ширек финалда чехиялықтар Мириам Колодзиэёва – Анета Лабуткованы 6:1, 3:6, 10:7 есебімен жеңді.
Қазақстандық жұп финалға шығу үшін америкалық Джесси Эйни – оңтүстіккореялық Со Хен Пакпен таласады.
Жұптық сында тағы бір қазақстандық Екатерина Дмитриченко украиналық Виктория Петренкомен бірге жартылай финалдан тыс қалды. Олар осы жарыстың 2-ракеткалары румыниялық Кристина Дину – италиялық Анжелика Морателлимен тартысты кездесу өткізді. Бірінші партияда 4:6 есебімен қарсыластарына есе жіберсе, екіншісінде қарымта қайырды – 6:4. Тай-брейкте Дину мен Морателлидің жолы болды – 11:9.
Еске сала кетейік, бұдан бұрын АҚШ турнирінде 6 қазақстандық бақ сынайтынын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).