АСТАНА. ҚазАқпарат - Қазақстанның қос бірдей спортшысы Испанияның Мальорка қаласында 13-19 маусым аралығында теннистен өтетін халықаралық турнирге қатысады.
Чемпионат.ком сайтының хабарлауынша, Қазақстанның бірінші, әлемнің 35-інші, осы жарыстың 5-інші ракеткасы Юлия Путинцева алғашқы айналымда іріктеу сайыстарынан өтіп, негізгі турнирге жолдама алған теннисшілердің бірімен күш сынасады. Ал Ярослава Шведова осы турнирге арнайы шақыртумен қатысып отырған словакиялық Даниэла Гантуховамен кортқа шығады. Қазақстандық теннисшілер бастапқы кездесулерін жеңіспен аяқтаса, екінші айналымда өзара шеберлік байқасады.
Айта кетейік, көптеген спортшылар үшін алдағы Уимблдон турниріне дайындық есебінде өтетін Мальорка жарысының жүлде қоры - 226750 АҚШ доллары. Турнирдің басты жұлдызы - биылғы Ролан Гарростың жеңімпазы әрі өткен жылғы Уимблдонның финалисі, испаниялық Гарбинье Мугуруса. Сондай-ақ әлемнің бұрынғы бірінші ракеткалары, сербиялық Елена Янкович пен Ана Иванович те өнер көрсетеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).