АСТАНА. ҚазАқпарат - Парижде теннистен өтіп жатқан Ролан Гаррос турнирінің жартылай финалында әлемнің 47-інші ракеткасы, латвиялық Елена Остапенко мен дүниежүзілік рейтингте 31-інші сатыда тұрған швейцариялық Тимя Бачински бүгін өздерінің туған күндерінде шеберлік байқасты, деп хабарлайды «ҚазАқпарат» тілшісі.
Швейцариялық теннисші дәл осы күні 28-ге толса, латвиялық спортшы небәрі 20 жастың биігіне шықты.
«Еуроспорт» телеарнасынан тікелей эфирде көрсеткеніндей, бірінші партияда Е.Остапенко тай-брейкте 7:6 (7:4) есебімен басым түсті. Екінші партияда Т.Бачински 6:3 есебімен есе қайтарды. Үшінші, шешуші партияда қос теннисшінің де ұтатындай мүмкіндіктері болды. Дегенмен мұны Елена Остапенко сәтті пайдаланып, 6:3 есебімен жеңіске жетті. Сөйтіп 2 сағат 24 минутқа созылған тартысты матчта жастық жалын-жігеріне қоса шеберлігін көрсете білген Остапенко өз спорттық жолында алғаш рет «Үлкен дулыға» турнирінің финалына жолдама алды. Бұл - Латвияның теннис спорты тарихындағы әзірге рекордтық табыс.
Латвиялық теннисші сенбі күні финалда әлемнің үшінші және төртінші ракеткалары, чехиялық Каролина Плишкова немесе румыниялық Симона Халептің қай жеңгенімен ойнайды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).