АСТАНА. ҚазАқпарат - Қазақстандық теннисші Михаил Кукушкин Уимблдон турнирінің екінші айналымында әлемнің бірінші ракеткасы, испаниялық Рафаэль Надальмен күш сынасты, деп хабарлайды ҚазАқпарат тілшісі.
Дүниежүзілік рейтингте осы апта басында 77-інші сатыға көтерілген М.Кукушкин матчты сәтсіз бастап, бірінші партияда қарсыласы 3:0 есебімен алға шыққанымен, таразы басын теңестіре білді.
Дегенмен мықтының аты мықты, бұл сетте Надаль 6:4 есебімен басымдылық танытты. Содан кейінгі екі партияда әлемнің бірінші ракеткасы 6:3, 6:4 есебімен жеңіске жетті.
Бәсеке 2 сағат 26 минутқа созылды.
Бұдан бұрын 2014 жылғы Уимблдон турнирінің үшінші айналымында Р.Надаль М.Кукушкинді 6:7, 6:1, 6:1, 6:1 есебімен ұтқан болатын. 2010 жылы Бангкок пен 2012 жылы Монте-Карло турнирінде де испаниялық теннисшінің шеберлігі басым болды.
Осылайша биылғы Уимблдон турнирінде жекелей сында Қазақстаннан ешкім қалған жоқ.
Еске сала кетейік, бұдан бұрын әйелдер арасында Қазақстанның бірінші, әлемнің 53-інші ракеткасы Юлия Путинцеваның екінші айналымда рейтингте 14-інші орында тұрған ресейлік Дарья Касаткинадан жеңіліп қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).