НҰР-СҰЛТАН. ҚазАқпарат - Қазақстандық Михаил Кукушкин Дубай ATP 500 турнирінің екінші айналымына шыға алмады, деп хабарлайды ҚазАқпарат тілшісі.
Негізгі додаға іріктеу сайыстарынан кейін қосылған, бүгін жаңартылған рейтингіде 96-да 104-орынға сырғып кеткен қазақстандық теннисші алғашқы айналымда әлемнің 39-ракеткасы, германиялық Ян-Леннард Штруффпен кездесті.
Бірден ойын тізгінін қолына алған неміс теннисшісі бірінші партияда 6:3 есебімен басым түсті. Ол екінші сетте де қос брейкпен алға кетті - 3:0. Бұдан кейін Кукушкин брейк жасағанымен, одан әріге шамасы жетпеді - 2:6.
Бәсеке 1 сағат 13 минутқа созылды.
Германиялық спортшы екінші айналымда әлемнің 12-ракеткасы, канадалық Денис Шаповаловпен шеберлік байқасады.
Еске сала кетейік, бұдан бұрын А.Бубликтің Дубай турнирінің екінші айналымына шыққанын , оның бүгін ATP чемпиондық кестесінде 9-орынға көтерілгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).