АСТАНА. ҚазАқпарат - Мюнхен турнирінің алғашқы айналымында Қазақстанның бірінші, әлемнің 96-ыншы ракеткасы Михаил Кукушкин германиялық Маттиас Бахингермен күш сынасты, деп хабарлайды ҚазАқпарат тілшісі.
Дүниежүзілік рейтингте М.Бахингер 163-інші орында тұрғанымен, матч аса тартысты өрбіді. Бірінші партияда неміс теннисшісі тай-брейкте 10:8 есебімен жеңіске жетті.
Екінші партияда қазақстандық спортшы қарсыласын 6:3 есебімен ұтты.
Шешуші, үшінші партияда М.Бахингер дәл сондай есеппен қарымта қайырды. Сөйтіп 2 сағат 46 минутқа созылған матчта неміс спортшысы басымдылық танытты. Енді ол екінші айналымда әлемнің 22-інші ракеткасы, оңтүстіккореялық Чхун Хенмен кездеседі.
Жүлде қоры 605525 АҚШ долларына бағаланған Мюнхен турнирі 6 мамырда мәреге жетеді.
Еске сала кетейік, бүгін қазақстандық теннисші Юлия Путинцева Рабат (Марокко) турнирінің алғашқы айналымында испаниялық Сара Соррибес-Тормоға жол бергенін жазған болатынбыз. Осы турнирде тағы бір қазақстандық спортшы Зарина Дияс италиялық теннисші Сара Эрранимен кортқа шығады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).