АСТАНА. ҚазАқпарат - Қазақстандық теннисші Михаил Кукушкин Роттердам (Нидерланды) турнирінің екінші айналымында босниялық Дамир Джумхурмен кездесті, деп хабарлайды ҚазАқпарат тілшісі.
М.Кукушкин дүниежүзілік рейтингте 53-орында тұрса, қарсыласы одан үш саты төмен еді. Теннисшілердің бабы мен бағы келіссе, рейтингке қарамайтыны анық. Мысалы, осының алдында Д.Джумхур бірінші айналымда әлемнің 12-ракеткасы, грекиялық Стефанос Циципасты тізе бүктірген болатын.
Қазақстандық теннисшімен бәсекені де сәтті бастаған босниялық спортшы бірінші партияны өз пайдасына шешті - 6:4. Тартысты өткен екінші партия 6:6 есебімен тай-брейкке ұласты. Мұнда бірден минибрейк жасаған Д.Джумхур ақыры күш бермеді - 7:3.
Матч 1 сағат 42 минутқа созылды. Дамир Джумхур ширек финалда әлемнің 33-ракеткасы, франциялық Гаэль Монфиспен шеберлік байқасады.
Бір қызығы, М.Кукушкин бұдан бұрын София турнирінің екінші айналымында дәл осы Г.Монфиспен жолы тоқайласып, жеңіліп қалып, ширек финалға шыға алмаған болатын.
Еске сала кетейік, осыған дейін М.Кукушкиннің Роттердам турнирінде босниялық теннисшімен кездесетінін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).