НҰР-СҰЛТАН. ҚазАқпарат – Қазақстандық Михаил Кукушкин Санкт-Петербор ATP турнирінің ширек финалына шықты, деп хабарлайды ҚазАқпарат тілшісі.
Осы жарыстың алтыншы, әлемнің 57-ракеткасы М.Кукушкин екінші айналымда рейтингте 86-орында тұрған босниялық Дамир Джумхурмен шеберлік байқасты. Қарсыластар осыған дейін төрт мәрте кездессе, соның үшеуінде босниялық теннисші жеңіске жеткен екен.
Бұл жолы бірінші партияда қазақстандық спортшы тай-брейкте басым түсті – 7:6 (7:2).
Екінші партияда М.Кукушкин матч тағдырын шеше білді – 6:2. Ойын барысында ол үш мәрте, қарсыласы бір рет қана брейк жасай алды.
Бәсеке 1 сағат 42 минутқа созылды.
М.Кукушкин ширек финалда осы доданың екінші, әлемнің 9-ракеткасы, ресейлік Карен Хачанов немесе рейтингте 64-сатыдағы португалиялық Жоау Соузаның біреуімен кортқа шығады.
Еске сала кетейік, бұдан бұрын М.Кукушкиннің Санкт-Петербор жарысын сәтті бастағанын, Зарина Диястың Осака турнирінің ширек финалына шыға алмағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).