АСТАНА. ҚазАқпарат - Қазақстандық Михаил Кукушкин Шанхай турнирінің екінші айналымында оңтүстікафрикалық Кевин Андерсонмен күш сынасты, деп хабарлайды ҚазАқпарат тілшісі.
М.Кукушкин дүниежүзілік рейтингте 83-інші орында тұрса, осы жарыстың жетінші ракеткасы болып тіркелген К.Андерсон сегізінші сатыда келеді. Сондықтан Кевин Андерсонның бұл бәсекенің фавориті екендігі анық-ты.
Бірінші партияда оңтүстікафрикалық теннисші есеп 2:1 болып тұрған мезетте брейк жасай білді. Сөйтіп ол бұл басымдылығынан айырылған жоқ - 6:3.
Екінші сетте де қос бірдей брейк жасаған К.Андерсон 6:2 есебімен матчты аяқтады. Кездесу 1 сағат 5 минутқа созылды.
Кевин Андерсон үшінші айналымда әлемнің 15-інші ракеткасы, Грекия елінің өкілі Стефанос Циципаспен шеберлік байқасады.
М.Кукушкин бұдан төрт жыл бұрын дәл осы жарыстың екінші айналымында К.Андерсонды 6:4, 6:2 есебімен ұтқан болатын. Бұл жолы сол жетістігін қайталай алмады.
Еске сала кетейік, бұдан бұрын қазақстандық теннисшінің жүлде қоры 7 млн АҚШ долларынан асатын Шанхай турнирінің екінші айналымына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).