АСТАНА. ҚазАқпарат - Қазақстанның бірінші, әлемнің 71-інші ракеткасы Михаил Кукушкин Вена турнирінің жартылай финалында жапониялық Кей Нисикоримен күш сынасты, деп хабарлайды ҚазАқпарат тілшісі.
Мұның алдында жапониялық теннисші осы турнирдің бірінші ракеткасы болып тіркелген, әлемдік рейтингте 7-інші орында тұрған австриялық Доминик Тимді ұтқан еді. Сондықтан бұл кездесудің фавориті рейтингте 11-інші орындағы К.Нисикоридің болуы заңды еді.
Бірінші партияны жапондық теннисші 6:4 есебімен ұтты.
Екінші сетте К.Нисикори 3:0 есебімен алға шықты. Ақыры сол басымдылығынан айырылмай, бұл партияны да жеңіспен аяқтады - 6:3.
Кездесу 1 сағат 30 минутқа созылды.
К.Нисикори финалда рейтингте 30-ыншы орындағы, испаниялық Фернандо Вердаско немесе оңтүстікафрикалық, әлемнің 8-інші ракеткасы Кевин Андерсонның біреуімен чемпиондық атақты сарапқа салады.
Осылайша бұған дейін табысты өнер көрсеткен М.Кукушкин жүлде қоры 2 млн АҚШ долларынан асатын Вена турнирінің финалына шыға алмады.
Еске сала кетейік, бұдан бұрын М.Кукушкиннің Вена турнирінің жартылай финалына шыққанын жазған болатынбыз.
Аталмыш жарыс ертең мәреге жетіп, жеңімпаз анықталады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).