АСТАНА. ҚазАқпарат - Қазақстанның бірінші, әлемнің 71-інші ракеткасы Михаил Кукушкин Вена турнирінің ширек финалында венгриялық Мартон Фучовичпен күш сынасты, деп хабарлайды ҚазАқпарат тілшісі.
Әлемдік рейтингте М.Фучовичтің 40-ыншы сатыда тұрғанына қарамастан, жартылай финал жолдамасын сарапқа салған матч аса тартысты өрбіді.
Бірінші партияда венгриялық теннисші 6:4 есебімен басым түсті.
Екінші сет шиеленісе түсіп, ақыры тай-брейкке дейін жетті. Мұнда қазақстандық спортшы 7:2 есебімен тай-брейкті өз есебіне жазды.
Үшінші, шешуші партия тағдыры да тай-брейкте шешілді. Есеп 3:3 болған мезетте Т.Фучович минибрейк жасап, алға шықты. Дегенмен бұдан кейін М.Кукушкин қатарынан екі мәрте брейк жасап, ақыры матчты жеңіспен аяқтады - 7:4.
Тартысты кездесу 3 сағат 21 минутқа созылды.
Михаил Кукушкин финалға шығу үшін әлемнің 7-інші ракеткасы, австриялық Доминик Тим немесе рейтингте 11-інші орындағы жапониялық Кей Нисикоридің қай жеңгенімен таласады.
Еске сала кетейік, бұдан бұрын М.Кукушкиннің Вена турнирінің ширек финалына шыққанын жазған болатынбыз.
Жүлде қоры 2 млн АҚШ долларынан асатын аталмыш жарыс 28 қазан күні мәреге жетеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).