ОРАЛ. ҚазАқпарат - Қазақстандық Михаил Кукушкин Женева қаласында теннистен өтіп жатқан турнирдің екінші айналымында жапондық спортшы Кей Нисикоримен күш сынасты, деп хабарлайды «ҚазАқпарат» тілшісі.
«Еуроспорт» телеарнасынан тікелей эфирде көрсеткеніндей, М.Кукушкин бірінші партияда атақты қарсыласымен тайталасып-ақ бақты, тіпті жеңетіндей мүмкіндігі болмай қалған жоқ. Қазақстандық теннисші әлемдік рейтингте 88-інші орында тұрса, К.Нисикори тоғызыншы сатыда келеді. Сондықтан жапондық спортшының шешуші сәттерде шеберлігі көрініп тұрды. Ол бірінші партияны 6:4 есебімен ұтса, екіншісінде бірден 3:0 есебімен алға кетті. Ақыры бұл партияны да 6:3 есебімен өз пайдасына жазып, ширек финалға жолдама алды. Ал бірінші айналымда Италия елінің өкілі Роберто Маркораны 6:2, 6:2 есебімен тізе бүктірген М.Кукушкин енді әлем біріншілігімен тең саналатын «Үлкен дулыға» турнирінің бірі, қазіргі кезде іріктеу сайыстары өтіп жатқан Францияның ашық чемпионаты - Ролан Гарросқа дайындалатын болады.
Айта кетейік, жүлде қоры 536 774 АҚШ долларын құрайтын Женева турнирі 27 мамырда мәреге жетеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).