19:00, 09 Мамыр 2018

Теннис: Михаил Кукушкин әлемнің 8-інші ракеткасына есе жіберді

АСТАНА. ҚазАқпарат - Қазақстандық Михаил Кукушкин Мадрид турнирінің екінші айналымында әлемнің 8-інші ракеткасы, оңтүстікафрикалық Кевин Андерсонмен күш сынасты, деп хабарлайды ҚазАқпарат тілшісі.

Аса тартысты өткен матчты сәтті бастаған, әлемдік рейтингте 96-ыншы орында тұрған М.Кукушкин бірінші партияда 7:5 есебімен жеңіске жетті.
Екінші партия тай-брейкке дейін жетіп, онда К.Андерсон 7:3 есебімен таразы басын аудара білді.

Үшінші, шешуші партияны оңтүстікафрикалық теннисші 6:2 есебімен ұтты. Кездесу 2 сағат 15 минутқа созылды.

Осылайша іріктеу сайыстарынан кейін негізгі турнирге қосылған Михаил Кукушкин әлемнің 8-інші ракеткасын ұта алмады.

Еске сала кетейік, бұдан бұрын М.Кукушкиннің Мадрид турнирінің екінші айналымына шыққанын жазған болатынбыз.

Спорт Қоғам
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).