АСТАНА. ҚазАқпарат - Қазақстанның бірінші, әлемнің 96-ыншы ракеткасы Михаил Кукушкин Мадридтің негізгі турниріне жолдама алды, деп хабарлайды ҚазАқпарат тілшісі.
Турнирді іріктеу сайыстарынан бастаған қазақстандық теннисші әуелі дүниежүзілік рейтингте 107-інші орында тұрған франциялық Николя Маюды 6:3, 6:4 есебімен тізе бүктірді.
Бүгін іріктеу сайысының финалында М.Кукушкин әлемнің 71-інші ракеткасы, сербиялық Виктор Троицкимен күш сынасты. Аса тартысты өткен бәсекенің бірінші партиясында қазақстандық теннисші тай-брейкті 7:6 (7:5) сәтті өткізді.
Екінші партияда М.Кукушкин қарсыласын бет қаратпай, 6:1 есебімен ұтты. Осылайша ол негізгі турнирге жолдама алды.
Жүлде қоры 7,4 млн АҚШ долларынан асатын Мадрид турниріндегі М.Кукушкиннің келесі қарсыласы кейін анықталады. Бұл жарыс 13 мамыр күні мәреге жетеді.
Еске сала кетейік, әйелдер арасындағы Мадрид турнирінде қазақстандық Зарина Диястың алғашқы айналымда Пуэрто-Рико елінің өкілі Моника Пуигке есе жібергенін бұдан бұрын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).