НҰР-СҰЛТАН. ҚазАқпарат – Қазақстандық, әлемнің 168-ракеткасы Михаил Кукушкин Марсель ATP 250 турнирінің екінші айналымына шыға алмады, деп хабарлайды ҚазАқпарат тілшісі.
Негізгі додаға іріктеу сайыстарынан кейін қосылған М.Кукушкин бірінші айналымда әлемнің 109-ракеткасы, франциялық Пьер-Юг Эрбермен кездесті.
Бірінші партия тағдыры тай-брейкте шешіліп, франциялық спортшының еншісінде кетті – 7:6 (7:5).
Екінші сетте есеп 6:5 болған мезетте корт иесі тағы бір брейк жасап, матчты тәмамдады – 7:5. 1 сағат 54 минутқа созылған тартысы бәсеке барысында М.Кукушкин 6 эйс жасап, 2 брейк-пойнтты түгел пайдаланды. Қарсыласы 8 эйс, 3 брейкке (8 брейк-пойнт) қол жеткізді.
Осылайша қазақстандық теннисші жүлде қоры 545,2 мың еуроға бағаланған турнирде жарыс жолынан шығып қалды.
Еске сала кетейік, бұдан бұрын елордада теннистен әйелдер арасында ірі халықаралық жарыс өтетінін, Александр Бубликтің Доха турнирінің екінші айналымына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).