АСТАНА. ҚазАқпарат - Қазақстанның бірінші, әлемнің 84-інші ракеткасы Михаил Кукушкин Шанхай турнирі іріктеу сайысының финалында италиялық Маттео Берреттинимен кездесті, деп хабарлайды ҚазАқпарат тілшісі.
Әлемдік рейтингте италиялық теннисші 58-інші сатыда тұрғанына қарамастан, М.Кукушкин матч барысында таразы басын өзіне аудара білді.
Бірінші партияда қазақстандық теннисші 7:5 есебімен жеңіске жетті.
Екінші сетте есеп 5:4 болған мезетте М.Кукушкин брейк жасай білді. Сөйтіп матчты сәтті түйіндеді - 6:4.
Кездесу 1 сағат 43 минутқа созылды.
Қазақстандық теннисшінің Шанхайдың негізгі жарысындағы алғашқы қарсыласы кейін анықталады.
Жүлде қоры 7 млн АҚШ долларынан асатын бұл турнир 14 қазан күні мәреге жетеді.
Еске сала кетейік, бұдан бұрын Зарина Диястың Гонконг турнирінде бақ сынайтынын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).