АСТАНА. ҚазАқпарат - Қазақстандық Александр Недовесов теннистен Алматыда өтіп жатқан челленджер турнирінің ширек финалына шықты, деп хабарлайды ҚазАқпарат тілшісі.
Дүниежүзілік рейтингте 254-інші орында тұрған А.Недовесов кеше отандасы Тимур Хабибуллинді үш партияда ұтқан еді.
Бүгін қазақстандық теннисші осы турнирдің 7-інші ракеткасы болып тіркелген хорватиялық, рейтингте 203-інші сатыда тұрған Нино Сердарусицпен күш сынасты. Бұл тартысты матч та үш сетке, 2 сағат 18 минутқа созылды. Недовесов бірінші партияда 5:7 есебімен ұтылып қалғанымен, содан кейінгі екі сетте (6:4, 6:4) есе қайтара білді.
А.Недовесов жүлде қоры 50 мың АҚШ доллары болатын Алматы турнирінің жартылай финалына шығу үшін әлемнің 406-ыншы ракеткасы, 19 жасар австриялық Юрий Родионовпен күш сынасады.
Биыл үшінші рет ұйымдастырылып отырған, 16 маусымда мәреге жететін Алматы турнирінде жекелей сында Қазақстаннан Недовесовтен басқа ешкім қалған жоқ.
Еске сала кетейік, бұдан бұрын А.Недовесовтің Шымкент турнирінде жартылай финалға шыға алмағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).