АСТАНА. ҚазАқпарат - Қазақстанның бірінші, әлемнің 44-інші ракеткасы Юлия Путинцева Брисбен (Австралия) турнирінің екінші айналымына шыға алмады, деп хабарлайды ҚазАқпарат.
Жүлде қоры 899 500 АҚШ долларына бағаланған жарыста Ю.Путинцева осы турнирдің бесінші ракеткасы болып тіркелген, әлемдік рейтингте 8-інші орында тұрған чехиялық Каролина Плишковамен кездесті.
Аса тартысты өткен матчта чехиялық спортшы 4:6, 6:3, 6:4 есебімен жеңіске жетті.
Бәсеке 2 сағат 17 минутқа созылды.
Кезінде дүниежүзілік рейтингте көш бастаған К.Плишкова 10 брейк-пойнттың төртеуін пайдалана алды. Ал Путинцева 3 брейкке қол жеткізді.
Еске сала кетейік, бұдан бұрын тағы бір қазақстандық теннисші Зарина Диястың Шэньчжэнь (Қытай) турниріндегі қарсыласы анықталып, одан кейін жеңіліп қалғанын жазған болатынбыз.
Енді теннисшілер 10-26 қаңтар аралығында өтетін Австралия ашық чемпионатында сәтті өнер көрсетсе, ұпайды көбірек жинап, рейтингте көтеріле алады. Австралия ашық біріншілігі - жыл сайын өтетін төрт «Үлкен дулыға» турнирінің бірі.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).