19:54, 01 Шілде 2018

Теннис: Путинцева Қазақстанның бірінші ракеткасы атанды

АСТАНА. ҚазАқпарат - Әйелдер теннисі қауымдастығының (WTA) жаңартылған рейтингісінде Юлия Путинцева Қазақстанның бірінші ракеткасы атанды, деп хабарлайды ҚазАқпарат тілшісі.

Теннис көшін бұрынғыша румыниялық Симона Халеп бастап келеді. Даниялық Каролин Возняцки екінші, испаниялық Гарбинье Мугуруса үшінші орында.

Қазақстандықтардан Юлия Путинцева екі саты жоғарылап, 53-інші орынға көтерілді. Бұған дейін Қазақстанның бірінші ракеткасы болған Зарина Дияс бір саты төмен түсіп, 54-інші орынға жайғасты. Осылайша Ю.Путинцева Уимблдон турнирі алдында Қазақстанның бірінші ракеткасы атанып отыр.

Еске сала кетейік, «Үлкен дулыға» турнирінің бірі - Уимблдон жарысы ертең басталады. Ю.Путинцева алғашқы айналымда Польша елінің өкілі Магда Линетпен, ал З.Дияс австралиялық Дарья Гавриловамен кездеседі.

Ерлер арасында Қазақстаннан жалғыз қатысатын Михаил Кукушкин канадалық Вашек Поспишилмен шеберлік байқасады. Оны жеңсе, әлемнің бірінші ракеткасы, атақты испаниялық теннисші Рафаэль Надальмен кортқа шығуы мүмкін.

Рейтинг келесіде осы Уимблдон турнирінен кейін жаңаратын болады.

Спорт Қоғам
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).