НҰР-СҰЛТАН. ҚазАқпарат – Әлемнің 28-ракеткасы, қазақстандық Юлия Путинцева Мельбурндағы Grampians Trophy WTA 500 турнирін сәтті бастады, деп хабарлайды ҚазАқпарат тілшісі.
Аустралияда қатаң карантинде болған теннисшілер үшін арнайы ұйымдастырылған жарыста Ю.Путинцева алғашқы кездесуін рейтингте 191-орында тұрған испаниялық Джеорджина Гарсия Переспен өткізді.
Барынша тартысты өрбіген бірінші партия тағдыры тай-брейкте шешілді. Тай-брейкте қазақстандық теннисші бет қаратпады – 7:6 (7:1).
Екінші партияда есеп 3.3 болған мезетте Ю.Путинцева брейк жасап, алға кетті. Ақыры осы басымдылығын сақтап қала алды – 6:4.
Бәсеке 1 сағат 43 минутқа созылды.
Ю.Путинцева екінші айналымда әлемнің 13-ракеткасы, Беларусь өкілі Виктория Азаренкомен күш сынасады.
Қазақстанның бірінші, әлемнің 19-ракеткасы Елена Рыбакина доданы екінші айналымнан бастайды. Ол рейтингте 66-сатыдағы чехиялық Барбора Крейчиковамен шеберлік байқасады.
Еске сала кетейік, бұдан бұрын Дмитрий Попконың Анталия жарысының екінші айналымына өткенін, Михаил Кукушкиннің Мельбурн турнирінің үшінші айналымына шыға алмағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).