НҰР-СҰЛТАН. ҚазАқпарат – Қазақстандықтар Юлия Путинцева мен Зарина Дияс Цинциннати (АҚШ) WTA турнирінің үшінші айналымына өте алмады, деп хабарлайды ҚазАқпарат тілшісі.
Дүниежүзілік рейтингте 42-орында тұрған Ю.Путинцева әлемнің 10-ракеткасы, 2017 жылғы US Open турнирінің жеңімпазы, америкалық Слоан Стивенспен кездесті.
Екі сағаттан астам уақытқа созылған тартысты бәсекеде қазақстандық теннисші матчті сәтті бастады – 6:2. Әйтсе де қалған екі сетте С.Стивенс жеңіске жетті – 6:4, 6:3.
Рейтингте 80-сатыдағы Зарина Дияс әлемнің 22-ракеткасы, тағы бір америкалық София Кенинмен күш сынасты. Мұнда С.Кенин басымдылық көрсетті – 6:4, 6:1.
18 тамызда мәреге жететін жарыстың ширек финалына шығу үшін С.Стивенс ресейлік Светлана Кузнецовамен, ал С.Кенин әлемнің 7-ракеткасы, украиналық Элина Свитолинамен шеберлік байқасады.
Енді теннисшілерімізге биылғы «Үлкен дулыға» додасының соңғысы, 26 тамыз – 8 қыркүйек аралығында Нью-Йоркте өтетін US Open турнирінде табыс тілейміз.
Еске сала кетейік, бұдан бұрын Зарина Диястың Цинциннати турнирінің екінші айналымына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).