АСТАНА. ҚазАқпарат - Қазақстанның бірінші, әлемнің 51-інші ракеткасы Юлия Путинцева Тайбэй турнирінің ширек финалына өтті, деп хабарлайды «ҚазАқпарат» тілшісі.
Ол бүгін дүниежүзілік рейтингте 273-інші орында тұрған Тайбэй елінің өкілі Чжан Кайчжэньді тізе бүктірді. Бірінші партияда Юлия 6:3 есебімен басымдылық көрсетті. Екінші партияда қазақстандық теннисші оңай жеңіске жететіндей көрінгенмен, шиеленісіп барып, тай-брейкпен аяқталды. Онда Путинцева 7:3 есебімен басым түсті. Кездесу 1 сағат 48 минутқа созылды.
Путинцева жартылай финалға шығу үшін Украина елінің өкілі, әлемнің 85-інші ракеткасы Катерина Козловамен шеберлік байқасады. К.Козлова бірінші айналымда осы турнирдің екінші ракеткасы, қытайлық Чжан Шуайды, бүгін оның отандасы Йин-Йин Дуаньды жолдан тайдырған болатын.
Еске сала кетейік, бүгін осы турнирде қазақстандық Зарина Дияс румыниялық Моника Никулескуден ұтылып қалды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).