АСТАНА. ҚазАқпарат - Қазақстандық Юлия Путинцева Тайбэй турнирінің ширек финалында Украина елінің өкілі Катерина Козловамен күш сынасты, деп хабарлайды «ҚазАқпарат» тілшісі.
Путинцева дүниежүзілік рейтингте 51-інші, ал Козлова 85-інші сатыда тұрғанына қарамастан, ойын тартысты өрбіді. Бірінші партия соңында брейк жасаған украиналық теннисші 7:5 есебімен жеңіске жетті.
Екінші партияда есеп 4:3 болып тұрған мезетте Козлова брейк жасады. Содан кейін өз геймін алып, 6:3 есебімен басым түсті. Кездесу 1 сағат 42 минутқа созылды.
К.Козлова жартылай финалда румыниялық Моника Никулеску немесе германиялық, кезінде Уимблдон турнирінің финалында өнер көрсеткен Сабина Лисицкидің қай жеңгенімен шеберлік байқасады.
Еске сала кетейік, осы турнирге қатысқан тағы бір қазақстандық теннисші Зарина Дияс екінші айналымда М.Никулескуге есе жіберген болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).