02:25, 04 Шілде 2018

Теннис: Путинцева Уимблдон турнирін жеңіспен бастады

АСТАНА. ҚазАқпарат - Қазақстанның бірінші, әлемнің 53-інші ракеткасы Юлия Путинцева Уимблдон турнирінің алғашқы айналымында поляк теннисшісі Магда Линетпен кездесті, деп хабарлайды ҚазАқпарат тілшісі.

Дүниежүзілік рейтингте 80-інші орында тұрған Линетпен бәсеке барынша тартысты өтті.

Қазақстандық теннисші бірінші партияда 6:3 есебімен басым түскенімен, екіншісінде дәл сондай есеппен есе жіберді.

Үшінші, шешуші партияда есеп 5:5 болған мезетте Польша елінің өкілі брейк жасап, алға шықты. Ол матчқа доп бергенде, Путинцева сәтті ойнап, қайыра брейкке қол жеткізіп, таразы басын теңестірді - 6:6.

Уимблдон турнирінде соңғы сетте тай-брейк ойналмайтындықтан, матч ұзарып кетті. Дегенмен бар күш-жігері мен шеберлігін салған Путинцева 10:8 есебімен жеңіске жетті.

Аса тартысты кездесу 2 сағат 43 минутқа созылды.

Ю.Путинцева екінші айналымда әлемнің 14-інші ракеткасы, бұрынғы отандасы, ресейлік Дарья Касаткинамен кортқа шығады.

Еске сала кетейік, бұдан бұрын ерлер арасында Михаил Кукушкиннің Уимблдон турнирін жеңіспен бастағанын жазған болатынбыз. Ол екінші айналымда әлемнің бірінші ракеткасы, испаниялық Рафаэль Надальмен кездеседі.

Спорт Қоғам
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).