НҰР-СҰЛТАН. ҚазАқпарат – Испаниялық Рафаэль Надаль ерлер арасында Аустралия ашық чемпионатының жеңімпазы атанды, деп хабарлайды ҚазАқпарат тілшісі.
Дүниежүзілік рейтингте 5-орында тұрған Р.Надаль финалда әлемнің 2-ракеткасы, ресейлік Даниил Медведевпен бас жүлдені сарапқа салды.
Алғашқы екі партияда ресейлік теннисші әбжілдік танытты – 6:2, 7:6 (7:5). Алайда содан кейін испаниялық спортшы қатарынан үш сетте 6:4, 6:4, 7:5 есебімен басым түсіп, жеңісті жұлып алды.
Аса тартысты өткен матч 5 сағат 24 минутқа созылды.
Осылайша Р.Надаль 21-рет «Үлкен дулыға» турнирінің чемпионы атанып, рекордтық нәтижеге қол жеткізді.
Өткен жылы Аустралия ашық чемпионатының финалында ресейлік Д.Медведевті 7:5, 6:2, 6:2 есебімен ұтқан әлемнің 1-ракеткасы, сербиялық Новак Джокович үздік шыққан еді.
Әйтсе де биыл ол визаға байланысты жанжалдан кейін еліне қайтарылып, додаға қатыса алмаған болатын.
Еске сала кетейік, бұдан бұрын Анна Данилинаның Аустралия ашық чемпионатының финалында жеңіліп қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).