НҰР-СҰЛТАН. ҚазАқпарат –Теннистен жыл сайын Парижде өтетін «Ролан Гаррос» турнирі тағы бір аптаға шегерілді, деп хабарлайды ҚазАқпарат тілшісі.
Ұлттық олимпиада комитеті мәлім еткеніндей, Франция ашық чемпионаты биылғы 27 қыркүйек пен 11 қазан аралығында өтетін болды.
Ұйымдастырушылар АТР және WTA-мен кеңескеннен кейін осындай шешімге келді. Бұл теннисшілердің тағы бір «Үлкен дулыға» додасы – US Open турнирінен кейін қалпына келулеріне мүмкіндік береді.
Бұдан бұрын жазғанымыздай, «Ролан Гаррос» турнирі күзге қалдырылып, 20 қыркүйек пен 4 қазан аралығында өтетін болған-ды. Олай болған жағдайда бір апта бұрын аяқталатын US Open турнирінен кейін спортшылардың дайындалуына уақыт қалмайтын.
«Ролан Гаррос» – жыл сайын өтетін төрт «Үлкен дулыға» турнирінің бірі. Оған қазақстандық теннисшілер де үнемі қатысып, бақ сынап келеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).