АСТАНА. ҚазАқпарат - Париж қаласында 22 мамыр - 5 маусым аралығында өтетін Ролан Гаррос турнирінде қазақстандықтардың қарсыластары белгілі болды.
Чемпионат.ком сайтының хабарлауынша, әйелдер арасындағы жарыста Қазақстаннан төрт бірдей спортшы бақ сынамақ. Атап айтқанда, Қазақстанның бірінші ракеткасы Юлия Путинцева бірінші айналымда канадалық Александра Вознякпен күш сынасады. Ярослава Шведоваға күштірек қарсылас тап болды. Ол бұрынғы отандасы, ресейлік, осы турнирдің 13-інші ракеткасы болып тіркелген Светлана Кузнецовамен кортқа шығады. Зарина Дияс германиялық Карина Виттефтпен, ал Галина Воскобоева қытайлық Чжан Шуаймен шеберлік байқасады.
Ерлер арасындағы бәсекеге Қазақстаннан жалғыз Михаил Кукушкин қатыспақ. Ол бірінші айналымда франциялық Адриан Маннариномен кездеседі.
Айта кетейік, Ролан Гаррос жарысы - әлем чемпионатымен тең болып есептелетін төрт «үлкен дулыға» турнирінің бірі.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).