АСТАНА. ҚазАқпарат - Парижде өтіп жатқан Ролан Гаррос турнирінің бірінші айналымында қазақстандық Михаил Кукушкин франциялық Адриан Маннариномен күш сынасты.
Тікелей спорттық көрсетілім арқылы мәлім болғанындай, бірінші партияда 6:4 есебімен франциялық теннисші басым түссе, екіншісінде М.Кукушкин (6:2) таразы басын теңестірді. Алайда үшінші партияда дәл осындай есеппен (6:2) А.Маннарино есе қайырды. Төртінші партияда есеп 3:3 болып тұрған кезде қазақстандық теннисші өз геймін беріп қойды. Дегенмен қайта брейк жасап, есепті теңестірді. Әйтсе де өзі доп берген сәтте мүмкіндігін пайдалана алмады. Бұл шешуші сетте А.Маннарино 6:4 есебімен жеңіске жетті.
Сөйтіп әлемдік рейтингте 83-інші орында келе жатқан М.Кукушкин өзінен он сатыдай жоғары тұрған теннисшіден айласын асыра алмады. Ол Ролан Гаррос турниріне ерлер арасында Қазақстаннан қатысқан жалғыз-ақ ойыншы болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).