НҰР-СҰЛТАН. ҚазАқпарат - Қазақстандық Елена Рыбакина Бастад (Швеция) челленджер турнирінің ширек финалына шыға алмады, деп хабарлайды ҚазАқпарат тілшісі.
Дүниежүзілік рейтингте 109-орында тұрған Е.Рыбакина екінші айналымда әлемнің 117-ракеткасы, жапониялық Мисаки Доимен кездесті.
Матчты сәтті бастаған қазақстандық теннисші бірінші партияны өз есебіне жаза білді - 6:4.
Е.Рыбакина екінші сетте де брейк жасап, алға шықты - 4:2. Бұдан кейін есепті ұлғайтатындай мүмкіндігі болды. Алайда М.Дои жеңістік бермей, қайыра брейкпен таразы басын теңестірді - 4:4. Ақыры тағы бір брейкпен түйіндеді - 6:4.
Үшінші, шешуші партияда брейк жасаған жапониялық спортшы алға шықты - 3:0. Дегенмен қазақстандық теннисші қатарынан төрт геймді алды - 4:3. Бәрібір жеңіс Доидың еншісінде кетті - 6:4.
Тартысты бәсеке екі сағаттан сәл астам уақытқа созылды.
М.Дои жартылай финалға шығу үшін осы жарыстың төртінші, әлемнің 96-ракеткасы, германиялық Мона Бартельмен таласады.
Еске сала кетейік, бұдан бұрын Е.Рыбакинаның Бастад турнирін жеңіспен бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).