НҰР-СҰЛТАН. ҚазАқпарат - Қазақстанның бірінші, әлемнің 23-ракеткасы Елена Рыбакина Доха WTA 500 турнирінің екінші айналымына шыға алмады, деп хабарлайды ҚазАқпарат тілшісі.
Қазақстандық теннисші алғашқы айналымда әлемнің 56-ракеткасы, германиялық Лаура Зигемундпен кездесті.
Бірінші партияда германиялық спортшының тай-брейкте жолы болды - 7:6 (9:7).
Л.Зигемунд екінші сетте есеп 3:3 болған мезетте брейкпен алға кетті. Әйтсе де есеп 5:3 болып, матчқа доп бергенде, сол мүмкіндігін пайдалана алмады. Дегенмен ол тағы да тай-брейкте жеңісті жұлып алды - 7:6 (7:5).
Аса тартысты өткен бәсеке 2 сағат 31 минутқа созылды.
Л.Зигемунд ширек финалға шығу үшін әлемнің 14-ракеткасы, Беларусь өкілі Виктория Азаренкомен таласады.
Жуырда Аделаида додасында дәл осы германиялық теннисшіні тағы бір қазақстандық Юлия Путинцева ұтқан болатын. Юлия бүйрегіне ота жасатқандықтан, Доха жарысына қатыса алмады.
Еске сала кетейік, бұдан бұрын Тимофей Скатовтың Нұр-Сұлтан турнирінің екінші айналымына өткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).