НҰР-СҰЛТАН. ҚазАқпарат - Қазақстанның бірінші, әлемнің 19-ракеткасы Елена Рыбакина Дубай турнирінің екінші айналымына шықты, деп хабарлайды ҚазАқпарат тілшісі.
Е.Рыбакина алғашқы айналымда әлемнің жетінші ракеткасы, биылғы Аустралия ашық чемпионатының жеңімпазы, америкалық София Кенинмен кездесті.
Бірінші партияда америкалық спортшы тай-брейкте басым түсті - 7:6 (7:2).
Екінші партияда Елена есе қайырды - 6:3.
Шешуші, үшінші сетте есеп 4:3 болған мезетте Рыбакина брейк жасай білді. Содан кейін ол матчқа доп бергенде, қателескен жоқ - 6:3.
Тартысты бәсеке екі сағатқа созылды.
Осылайша Аустралия чемпионын ұтқан Е.Рыбакина жүлде қоры 3 млн АҚШ долларына жуықтайтын жарыстың ширек финалына шығу үшін әлемнің 58-ракеткасы, чехиялық Катерина Синяковамен таласады. Елена жуырда Санкт-Петербург додасында К.Синякованы 6:3, 6:4 есебімен тізе бүктірген болатын.
Еске сала кетейік, бұдан бұрын А.Бубликтің Марсель турнирін жеңіспен бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).