НҰР-СҰЛТАН. ҚазАқпарат – Қазақстандық Елена Рыбакина Ухань турнирінің үшінші айналымына шықты, деп хабарлайды ҚазАқпарат тілшісі.
Е.Рыбакина екінші айналымда Тунис елінің өкілі Онс Жабермен шеберлік байқасты.
Қазақстандық теннисші әлемдік рейтингте 50-орында тұрса, қарсыласы одан төрт саты төмен еді.
Бірінші партияда Е.Рыбакина айқын басымдылық көрсетті – 6:1.
Екінші сетте де 4:3 есебімен алға шыққан еді. Алайда тунистік спортшы да брейк жасап, таразы басын теңестіріп кетті. Тай-брейкте О.Жабердің жолы болды – 7:6 (7:3).
Үшінші, шешуші партияны Е.Рыбакина жеңіспен аяқтай білді – 6:2.
Бәсеке 1 сағат 52 минутқа созылды.
Е.Рыбакина жүлде қоры 2,828 млн АҚШ долларына бағаланған жарыстың ширек финалына шығу үшін кезінде рейтинг көшін бастаған, осы турнирдің төртінші, әлемнің 6-ракеткасы, румыниялық Симона Халеппен кездеседі.
Еске сала кетейік, бұдан бұрын Е.Рыбакинаның Ухань турнирін сәтті бастағанын, ал Юлия Путинцеваның алғашқы айналымнан аса алмағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).