НҰР-СҰЛТАН. ҚазАқпарат - Қазақстандық Елена Рыбакина Уимблдон турнирінің іріктеу сайысын сәтті бастады, деп хабарлайды ҚазАқпарат тілшісі.
Жуырда 20-ға толған әлемнің 111-ракеткасы Е.Рыбакина бастапқы кездесуін рейтингте 195-сатыдағы аустралиялық Эллен Переспен өткізді.
Бірінші партияда қазақстандық спортшы қарсыласын бет қаратпай ұтты деуге болады - 6:1.
Екінші сетте Э.Перес 4:1 есебімен алға шықты. Бұдан кейін қатарынан бес геймді алған Е.Рыбакина матчты жеңіспен түйіндеді - 6:4.
Е.Рыбакина іріктеу сайыстарының жартылай финалында әлемнің 176-ракеткасы, Нидерланды елінің өкілі Ришель Хогенкамп немесе рейтингте одан екі саты төмен тұрған болгариялық Виктория Томованың біреуімен шеберлік байқасады.
Іріктеу сайыстарының жеңімпаздары осы аптада белгілі болып, 1 шілде күні басталатын негізгі турнирге жолдама алады.
Уимблдон жарысы - жыл сайын өтетін төрт «Үлкен дулыға» турнирінің бірі.
Еске сала кетейік, бұдан бұрын Юлия Путинцеваның Истбурн турнирінің екінші айналымына шыққанын, ал Зарина Диястың осы жарыста жеңіліп қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).